– Vi treng å vise fram kva vi gjer!

– Dette var imponerandes. Eg har aldri vore på eit slikt anlegg før. Eg tenkte det var mindre og langt i frå så effektivt. Dette var noko heilt anna enn kva ein får inntrykk av gjennom media.

Mannen i 40 åra har tatt med seg familien på fire frå Steinkjer. Dei såg tilfeldigvis omtalen i Trønder-Avisa og vart nysgjerrig.

– Så flott arrangement, god mat og ikkje minst veret som viser seg frå si beste side. Vi har hatt ein knall dag. Det er vel verdt ein times køyretur.

Slo på stortromma
Familien frå Steinkjer var nokre av nærmare 500 som hadde tatt turen til Flatanger laurdag. Dei besøkjande kunne velje mellom grilla laks, kajakk, rappelering, fiskekonkurranse og ikkje minst tur på sjøen ut til sjølve matfiskanlegget i fjorden like ved.

– Vi slo litt på stortromma i år og markere opninga litt meir enn kva me har gjort tidlegare. Vi ønskja fyrst og fremst og invitere folk i regionen. Mange har ikkje vore her før og me vil gjerne vise kva det er me gjer, seier Per Anton Løfsnes, dagleg leiar ved Namdal Akvasenter.  

– Kvifor?

– Vi er ein av dei største arbeidsplassane i kommunen, vi betyr mykje for bygda og regionen. Visningsanlegget skal vere ein stad dit folk kan kome og sjå. Her produserer vi sunn frisk laks. Det bør regionen og innbyggjarane og vere stolte av.

Godt inntrykk
Senteret i Flatanger er eit av i alt elleve visningsanlegg langs kysten og er samlokalisert og eigd av Bjørøya Fiskeoppdrett. Tidlegare i år valde dei elleve anlegga å gå saman i ei eiga stifting.
 
– Ein slik visningskonsesjon skal leggje til rette for at både turistar, skuleklasser og alle andre kan bli meir kjend med norsk havbruk.

– Og etter ein slik dag er målet?

– At folk får eit positivt inntrykk og fortel om det til kjende. Det er mange som meiner noko om havbruk, men aldri har vore på eit anlegg. Dei treng å vite kva det er me gjer. Vi har ingenting å skjule, seier Per Anton Løfsnes.
 

Vil du lese mer?